Kya Colleges Mein Dharam aur Jaati ke Naam Par Bhedbhav Hota Hai? (A Ground Reality)

Kya Colleges Mein Dharam aur Jaati ke Naam Par Bhedbhav Hota Hai? (A Ground Reality)

Main ek pass-out student hoon, aur apne college days se hi main naye bachon ki admission process mein help karta aaya hoon. Normal counselling aur guidance se lekar unhe sahi rasta dikhane tak, sab kuch bohot smooth lagta tha. Lekin recently, admission process ke dauran maine kuch aisi baatein observe ki jinhone mujhe andar tak jhakjhor diya.

Aaj main aapke sath ek real experience share kar raha hoon, jo kisi afwah par nahi, balki meri khud ki observation par based hai.

Case 1: The 2023-2024 BA LLB Admission Incident

2023-24 ke admission chal rahe the. Mere paas ek local Muslim student ka call aaya. Use BA LLB mein admission lena tha. Mujhe pata tha ki admissions open hain, toh maine confidently usse kaha ki admission pakka ho jayega.

Lekin us bache ne mujhe bataya ki college walo ne unhe mana kar diya hai ye keh kar ki "admissions full ho gaye hain." Mujhe doubt hua, toh maine seedhe college counsellor ko call lagaya jinke paas main bachon ko refer karta tha.

The Conversation:

- Me: "Sir, do bachon ka admission hona hai BA LLB mein. Ho jayega?"

- Counsellor: "Haan, bilkul ho jayega."

- Me: "Lekin sir, bachhe bol rahe hain ki unhe college se mana kar diya gaya hai?"

- Counsellor: "Kahan ke bachhe hain?"

- Me: "Local hain, under 15 KM radius."

- Counsellor: "Arre, maine hi unko mana kiya hai. Ye log college ka mahaul kharab karte hain, isliye 5-year course mein lene se mana kiya hai. Upar se orders hain. Tu unhe mana kar de."

Us waqt maine is baat ko normal liya. Mujhe laga ki shayad waqai local students ladai-jhagda zyada karte hain aur management mahaul theek rakhna chahta hai. Maine bache ko mana kar diya. Bache ne frustrated hokar kaha, "Theek hai, college jaakar hi baat karni padegi." Aaj sochta hoon toh lagta hai ki aisi situations hi ek student ke andar system ke khilaf nafrat paida karti hain. Ek bacha jo sirf padhna chahta tha, use bina kisi galti ke rok diya gaya.

Case 2: The 2026 Lead Generation Shock

Present year (2026) mein, maine admissions ke liye Instagram ads run kiye. Jo bhi leads mere paas aati, main aage forward kar deta tha. Achanak, mere paas wapas college management se call aaya.

The Conversation:

- Sir: "Arre yaar, saari Muslim leads kyun bhej raha hai? Mix bhej. Agar 2 Muslim hain, toh 4 Hindu hone chahiye."

- Me (Shocked): "Sir, main toh ads chala raha hoon. Jisko padhne ka mann hai, wo mujhe message kar raha hai aur main aapko details forward kar raha hoon."

- Sir: "Nahi, thoda dhyan de. Balance karke chal. Upar se orders hain."

Is call ke baad mera dimaag kharab ho gaya. Main ek ad run kar raha hoon jisme sab equal hain, toh main logo ko dharam ke aadhar par filter kaise kar sakta hoon? Kya ab mujhe ads mein ye likhna padega ki certain religion ke log message na karein?

The Inside Truth: College Policy or Discrimination?

Apne doubts clear karne ke liye main college gaya aur apni ek senior ma'am se baat ki jo management/counselling ka hissa thi. Unhone mujhe jo bataya, wo education sector ki ek dark reality hai.

Unhone confirm kiya ki college ne Hindu-Muslim students ka ek percentage ratio fix kiya hua hai. Unka logic phir wahi tha ki "local bachhe ladai karte hain".

Lekin mera sawal ye hai ki agar kisi local student ka padhne ka mann hai, aur wo bahar ke mehnge colleges afford nahi kar sakta, toh wo kahan jayega?

Maine ma'am se poocha:

"Ma'am, local Hindu bacho par toh aisi koi rok-tok nahi hai? Rahi baat ladai-jhagde ki, toh agar koi student misbehave karta hai, toh aap strict rules banaiye, agreements sign karwaiye, aur terminate kar dijiye. Lekin ek poori community ko education se door rakhna kahan ka justice hai? Aapki is mansikta ke sath koi bacha aage kaise padhega?"

Ma'am ke paas sirf ek jawab tha: "Humare hath mein kuch nahi hai. Jo upar se orders aate hain, karna padta hai."

Conclusion: Education Ya Agenda?

Ye story Ghaziabad ke ek reputed college ki hai, lekin darr is baat ka hai ki shayad ye trend aur bhi jagaho par aam ho raha hai.

My Takeaway:

- Agar aap colleges ko bhi Mandir banaoge, toh wahan sirf Hindu jayenge.

- Agar Masjid banaoge, toh sirf Muslim jayenge.

- Padhai ke sthan ko, sirf padhai ka sthan hi rehne do. Ise political ya religious agenda ka hissa mat banao.

Is sab mein galti un individual teachers ya counsellors ki nahi hai jo orders follow kar rahe hain. Asli problem Top Management ki choti mansikta hai, jinki positions badi hain lekin soch bohot choti. Education system mein is tarah ki practices par sakht karyawahi (strict action) honi chahiye. Padhai par sabka right hai, chahe wo kisi bhi dharam ya jagah se aata ho.

This is a real-life incident experienced by Subham.